المستريح الي من العقل خالي ماهوب بلجات الهواجيس غطاس

يقول من عدى على راس عالي ^^ رجم طويل يدهله كل قرناس
في راس مرجوم عسير المنالي ^^ تلعب به الارياح من كل نسناس
في مهمه قفر من الناس خالي ^^ يشتاق له من حس بالقلب هوجاس
قعدت في راسه وحيد لحالي ^^ كني براس الرمث ملهب وحراس
متذكر في مرقبي وش جرالي ^^ وصفقت بالكفين ياسن على ياس
واخذت اعد ايامها والليلالي^^ دنيا تقلب ما عرفنا لها قياس
كم فرقت ما بين غالي وغالي ^^ لو شفت منها ربح ترجع للافلاس
يقطع دنيا مالها اول وتالي ^^ لو ضحكت للغبن تقرع بالاجراس
المستريح الي من العقل خالي ^^ ماهوب بلجات الهواجيس غطاس
ماهوب بمثلي مشكلاته جلالي ^^ وازريت اسجلهن بحبر وقرطاس
حملي ثقيل وشاليه باحتمالي ^^ واصبر على مر الليلالي والاتعاس
وارسي كما ترسي رواس الجبالي ^^ ولا يشتكي ضلع عليه القدم داس
ولا خاب ضني بالرفيق الموالي ^^ مالي مشاريه على نايد الناس
ولعل قصر ما يجيله ضلالي ^^ ينهد من عالي مبانيه للساس
والبوم من تالي الهدامه يلالي ^^ جزاك يا قصر الخنا وكر الادناس
لا صار ماهو مدهل للرجالي ^^ وملجا لمنهو يشكي الضيم والياس
بحسناك يامنشي حقوق الخيالي ^^ يخالق اجناس ومفني اجناس
متى تربع دارنا والمفالي ^^ وتخضر فياضي هقب ماهيب بيباس
وتشوف فيها الديدحان متوالي ^^ مثل الرعاف بخصر مدقوق الالعاس
وينثر على البيدا سوات الزوالي ^^ يشرق حماره شرقت الصبغ بالكاس